vo bhi kya din the ki jab us ka mira yarana tha
aap se begana vo tha ḳhud se main begana tha
rabt-o-zabt-e-bahami ke haa.e vo raz-o-niyaz
ashiqana husn tha aur ishq ma.ashuqana tha
main agar gul tha to vo tha bulbul-e-shaida mira
aur agar vo sham.a tha to is ka main parvana tha
vo kabhi divana tha mere liye laila kabhi
main kabhi us ke liye laila kabhi divana tha
us ko tha didar hasil mujh ko nazzara nasib
mere us ke darmiyan ik jalva-e-janana tha
mere kufr-e-ishq men thi ek imani ada
us ke kafir husn men ik ishva-e-turkana tha
sajid-o-masjud ham baham the ham donon ka dil
ka.abe ka ka.aba tha aur but-ḳhane ka but-ḳhana tha
mere ashk-e-shauq-e-paiham men thi us ki dastan
us ke andaz-e-tabassum men mira afsana tha
jhuum bhi uTThi udhar kaif-e-tarb se ruh-e-naz
aur idhar honTon hi par mere abhi paimana tha
haa.e vo shahba-e-zulf-o-kakul-o-gesu ki jab
aftab-e-sub.h bhi ik sham-e-ishrat-ḳhana tha
shamil-e-anfas the naghmat-e-aish-o-imbisat
zindagi ke saaz ka har zer-o-bam shahana tha
aankh se dil men sama jaate the dil se ruuh men
zindagi-e-shauq ka har haal betabana tha
haa.e vo mai-ḳhvari-e-baham ka aalam aah jab
ehtimam-e-mai baghair-e-shisha-o-paimana tha
jab milin ankhon se ankhen jab mile honTon se honT
har nazar paimana thi aur har-nafas mai-ḳhana tha
uf vo rabt-o-zabt sharm-o-shauq jab ba-hamd-digar
ek jazba mushtarak tha aur bebakana tha
vo taqaddum sharm ka ho ya tajavuz shauq ka
daḳhil-e-mustasniyat-e-laghzish-e-mastana tha
uf vo fart-e-shauq jis ka naam tha ranjidagi
alam-e-ranjidagi kis darja mahbubana tha
barhami par haa.e vo jurmana-ha-e-jurm-e-shauq
vaj.h-e-afzuni-e-shauq-e-jurm har jurmana tha
ho rahe the yuun basar roz-o-shab umr-e-nashat
mehr-o-mah se ehtimam-e-zinat-e-kashana tha
be-ta.alluq zindagi hone ka tha imkan hi kya
zindagi zulf-e-ta.alluq thi muqaddar shana tha
runuma lekin muqaddar se hua vo ishq ke
jo talavvun husn ki fitrat men mahbubana tha
husn to hai ik tajalli sham-e-har-mahfil-sifat
vo to kah dega ye ik andaz-e-mashuqana tha
haan magar kal ishq ko dekha ki vo shorida-baḳht
baḌh chuka tha zindagi men maut se divana tha
ja raha tha be-irada be-ḳhayal-e-samt-o-rah
aur zaban par nala-e-mauzun ye mazlumana tha
chashm hai mahrum-e-surat gosh mayus-e-sada
ḳhvab tha jo kuchh ki dekha jo suna afsana tha
Leave a Reply