ye ḳhabar aa.i hai aaj ik murshid-e-akmal ke paas
un ko dhamkaya kisi ne railway-signal ke paas
husn-e-avara ka ai hamdam bhala kya e’tibar
aaj bhaTanagar ke bas men hai to kal mittal ke paas
un ki vahshat se ye zahir ho raha hai ḳhud-ba-ḳhud
ye usi mauza.a men rahte hain jo hai mangal ke paas
baghban ki ab tavajjoh hai gulistan ki taraf
paude baḌh ke ḳhud laga.e hain ka.i kaT.hal ke paas
uTh gaya bazm-e-tarab se vo raqib-e-ru-siyah
rafta rafta haath jab pahuncha mira chappal ke paas
razm-gah men un se nazren laḌ rahi hain baar baar
ho raha hai ek danggal aur usi danggal ke paas
log un ki bazm men rah kar bhi hain mahrum-e-did
jan-ba-lab hain pyaas se baiThe hue hain nal ke paas
dekhiye ye bada-e-rangin ki adna si kashish
shaiḳh-sahib aur khisak kar aa ga.e botal ke paas
naseh-e-nadan ka shikva karna hai bilkul fuzul
vo to pagal hai koi kyuun jaa.e phir pagal ke paas
himmat-afza.i na jab ummal-e-ma.amuli ne ki
pahunchi rishvat afsaran-e-darja-e-avval ke paas
‘shauq’-sahib munis-e-tanha.i ki hajat ho gar
to kisi din be-takalluf chaliye seva-dal ke paas
Leave a Reply