Ishaq Athar Siddiqui
giraft-e-saya-e-divar se nikal aaya
main ek umr ke azar se nikal aaya
na janna bhi to ik janne ki surat hai
ajiib ruḳh mire inkar se nikal aaya
main apni qimat-e-ehsas ke javaz men tha
so ye hua ki main bazar se nikal aaya
abhi ruke bhi na the ham paḌav ki ḳhatir
naya safar na.i raftar se nikal aaya
samajh rahe the kahin dafn ho gaya hoga
vo ḳhauf phir dar-o-divar se nikal aaya
main chup hua to use bolna hi tha ik din
vo zinda harf lab-e-dar se nikal aaya
kisi ḳhayal se kya kya ḳhayal jaag uThe
ye shaghl lamha-e-bekar se nikal aaya
Leave a Reply