Shaghil Adeeb
uTha hi lete hain divar-o-dar saliqe se
banane vaale banate hain ghar saliqe se
nazar men rakhte hain vo zindagi shahadat ki
kaTane vaale kaTate hain sar saliqe se
saliqa-mand hai kitni ye gardish-e-dauran
ki aaj ugte hain sham-o-sahar saliqe se
suna hai ashk-e-nadamat ki hai baḌi qimat
saja le palkon pe tu ye guhar saliqe se
andhere saare ujalon sa jagmaga.enge
tu roz-o-shab pe nazar rakh magar saliqe se
tamam umr to guzri saliqe se sach hai
to ab jahan se bhi ‘shaghil’ guzar saliqe se
Leave a Reply