kis roz ilahi vo mira yaar milega
aisa bhi kabhi hoga ki dildar milega
juun chahiye vuun dil ki nikalunga havas main
jis din vo mujhe kaif men sarshar milega
ik umr se phirta huun liye dil ko baghal men
is jins ka bhi koi kharidar milega
mil jaega phir aap se ye zakhm-e-jigar bhi
jis roz ki mujh se vo sitamgar milega
ye yaad rakh ai kafir-e-bad-kesh qasam hai
mujh sa na koi tujh ko giraftar milega
‘iman’ na kahta tha main tujh se ye hamesha
jo shokh milega so dil-azar milega
Leave a Reply