Ghaalib

Gulzar

balli-maran ke mohalle ki vo pechida dalilon ki si galiyan

samne taal ki nukkad pe bateron ke qaside

gudgudati hui paan ki pikon men vo daad vo vaah va

chand darvazon pe latke hue bosida se kuchh taat ke parde

ek bakri ke mimyane ki avaz

aur dhundlai hui shaam ke be-nur andhere saae

aise divaron se munh jod ke chalte hain yahan

chudi-valan kai katre ki badi-bi jaise

apni bujhti hui ankhon se darvaze tatole

isi be-nur andheri si gali-qasim se

ek tartib charaghon ki shurua hoti hai

ek quran-e-sukhan ka safha khulta hai

asadullah-khan-‘ghalib’ ka pata milta hai