Sabir Abuhari
kuchh gham ka gham hua na ḳhushi ki ḳhushi hui
kis rahat-o-sukun se basar zindagi hui
us be-nava gada ko shahanshah janiye
jis ko nasib daulat-e-divangi hui
kaise shab-e-firaq kaTi kuchh na puchhiye
ik dastan hai ranj-o-alam se bhari hui
sajde ko sar jhuka diya apne hi paanv par
mujh ko jab apni zaat se kuchh agahi hui
ḳhud apne husn ki bhi na vo taab la saka
jis aadmi ke qalb men kuchh raushni hui
saaqi tire karam ki to kuchh intiha nahin
ye aur baat kam na miri tishnagi hui
furqat men bhi nasib hai mujh ko nashat-e-qurb
dil men kisi ki yaad hai aisi basi hui
‘sabir’ zaban pe harf-e-shikayat na la saka
us ki sarisht men hai qana.at bhari hui
Leave a Reply