har aah gham-e-dil ki ghammaz nahin hoti
aur vaah masarrat ka aghaz nahin hoti
jo rok nahin paati ashkon ki ravani ko
vo aankh gham-e-dil ki hamraz nahin hoti
har ashk-e-shahanshahi ik taaj nahin banta
har malka zamane men ‘mumtaz’ nahin hoti
milti hai ḳhamoshi se zalim ko saza yaaro
allah ki laThi men avaz nahin hoti
ik Thos haqiqat hai alfaz ke paikar men
ye sha.iri sha.ir ka e.ajaz nahin hoti
yuun umr ki qainchi ne par mere katar Daale
ab laakh karun koshish parvaz nahin hoti
daulat ki badaulat jo bandhti hai ‘asad’ sar par
dastar-e-fazilat vo e.azaz nahin hoti
Leave a Reply