Syed Hamid
zara na ham pe kiya e.atibar guzri hai
ye ruuh jism se begana-var guzri hai
hamen guman bhi na tha un ki tab-e-nazuk par
zara si baat sata.ish ki baar guzri hai
ḳhirad ke zor se himmat ke bal-o-par le kar
kahan kahan se ye musht-e-ghubar guzri hai
kaTega kaise ye viran be-sahara din
abhi to sirf shab-e-intizar guzri hai
badun-e-zaḳhm na ro.enge paanv ke chhale
bahe sarishk jahan nok-e-ḳhar guzri hai
kahan hai aariz ḳhurshid-e-nim-roze ki umr
miyan-e-kakul-e-shab-ha-e-tar guzri hai
chhupa labon pe tabassum ayaan jabin pe shikan
hansi ki baat unhen nagavar guzri hai
ga.i jidhar se vo mad.hosh ho ga.i mahfil
magar vo shoḳh nazar hoshiyar guzri hai
aqab men apne chhupa.e hazar-ha paikan
nazar ke samne mizhgan-e-yar guzri hai
hujum-e-shauq ke hathon gale pe ‘hamid’ ke
na puchhiye jo dam-e-iḳhtisar guzri hai
Leave a Reply