hai Tonk arz-e-pak vahin se uThenge ham
uTThi jahan se ḳhaak vahin se uThenge ham
divar-e-mai-kada ke udhar salsabil hai
farzandagan-e-tak vahin se uThenge ham
muddat se band hai jo daricha bahar ka
ai kunj-e-na-tapak vahin se uThenge ham
pairahan-e-falak pe jahan ḳhatt-e-nur hai
daman hai vaan se chaak vahin se uThenge ham
ham ne vahin pe chand ko dekha hai multafit
vo ghar hai tabnak vahin se uThenge ham
is ḳhaak hi ne ḳhaak ko paala hai umr bhar
paaya jahan se kaak vahin se uThenge ham
‘arshad’ ham apne shahr se aa to ga.e magar
apni vahin hai dhaak vahin se uThenge ham
Leave a Reply