Azhar Inayati
abhi bichhḌa hai vo kuchh roz to yaad aa.ega
naqsh raushan hai magar naqsh hai dhundla.ega
ghar se kis tarah main niklun ki ye maddham sa charagh
main nahin hunga to tanha.i men bujh ja.ega
ab mire ba.ad koi sar bhi nahin hoga tulua
ab kisi samt se patthar bhi nahin aa.ega
meri qismat to yahi hai ki bhaTakna hai mujhe
raste tu mire hamrah kidhar ja.ega
apne zehnon men racha lijiye is daur ka rang
koi tasvir banegi to ye kaam aa.ega
itne din ho ga.e bichhḌe hue us se ‘az.har’
mil bhi ja.ega to pahchan nahin pa.ega
Leave a Reply