Poet
ji raha huun main udasi bhari tasvir ke saath
shor karta huun siyah raat men zanjir ke saath
surḳh phulon ki ghani chhanv men chupke chupke
mujh se milta tha koi ik na.i tanvir ke saath
ik tiri yaad ki har saans ke nazdik rahi
ik tira dard ki chaspan raha taqdir ke saath
kabhi zaḳhmon ka bhi ḳhanda-e-gul ka mausam
ham pe khulta raha ik dard ki tafsir ke saath
baat aapas ki hai aapas hi men rahne diije
varna ham surḳhiyan ban ja.enge tash.hir ke saath
aap ki mez pe phir ek naya manzar hai
meri tasvir bhi hai aap ki tasvir ke saath
dil ke nazdik sar-e-sham-e-alam ai ‘nayyar’
zaḳhm ke chand chamak uThte hain tanvir ke saath
Leave a Reply