khushbu si koi aae to lagta hai ki tum ho
shisha kahin takrae to lagta hai ki tum ho
ehsas-e-mohabbat se kisi gosha-e-dil men
jab chot ubhar aae to lagta hai ki tum ho
pur-kaif hava men jo kisi ped ke niche
anchal mira lahrae to lagta hai ki tum ho
chhune se kabhi bad-e-saba ke mire tan men
ik barq si lahrae to lagta hai ki tum ho
sar rakh ke jo patthar pe kabhi rah-e-alam men
kuchh niind si aa jaae to lagta hai ki tum ho
jab sham-e-mulaqat padosi ke makan se
avaz koi aae to lagta hai ki tum ho
jab shana bhi karne na uthe haath hamara
aur zulf sanvar jaae to lagta hai ki tum ho
Leave a Reply