libas-e-ḳhak sahi par kahin zarur huun main
bata rahi hai chamak aankh ki ki nuur huun main
koi nahin jo miri lau se rasta dekhe
hava-e-tund bujha de tire huzur huun main
panah deta nahin koi aur sayyara
bhaTak raha huun ḳhala men zamin se duur huun main
na ho gira ke mujhe tu bhi ḳhaak men mil jaa.e
mujhe gale se laga le tira ghurur huun main
nikal paḌa huun yunhi itni barf-bari men
badan ke garm lahu ka ajab surur huun main
saza bhi kaaT chuka huun main jis ḳhata ki ‘nasim’
kise pukarun kahun is men be-qusur huun main
Leave a Reply