ḳhvab bikhrenge to ham ko bhi bikharna hoga
shab ki ik ek aziyyat se guzarna hoga
vo hamare hi rag-o-pai men nihan rahta hai
is ki tasdiq to ik din hamen karna hoga
apne ḳhakistar-e-tan ko liye kuche kuche
kya havaon ki tarah mujh ko guzarna hoga
hamen ahbab ki be-laus rifaqat ke sabab
vaqt aa.ega to be-maut bhi marna hoga
honge sahraon ke sannaTe nazar ki had men
koi vaadi na koi ḳhvab na jharna hoga
aa.ina aa.ina ḳhud saari disha.en hongi
aks-dar-aks magar ham ko ubharna hoga
chiḳhte ḳhvabon ki ta.abir yahi kahti hai
hogi haḌtal kahin to kahin dharna hoga
Leave a Reply