Hashim Raza Jalalpuri
na yuun bhi jhankiye sarkar ik samundar hai
ki meri ankhon ke us paar ik samundar hai
hamari tishna-dahani bujhi hai ḳhanjar se
vo aur hain jinhen darkar ik samundar hai
safina-ha-e-mohabbat ko gharq kar degi
ye jo hai biich men divar ik samundar hai
tum aao lauT ke tum ko gale laga lunga
ki mera dil bhi mire yaar ik samundar hai
nizam-e-shahar-e-baharan hai kis ke hathon men
jahan bhi dekhiye ḳhun-bar ik samundar hai
ghazal suna.i jo sarvat ko main ne ai ‘hashim’
vo bole sun ke suḳhan-kar ik samundar hai
Leave a Reply