shab-e-vasl hai bahs hujjat abas
ye shikve abas ye shikayat abas
hua un ko kab e’timad-e-vafa
jatate rahe ham mohabbat abas
yahan ab to kuchh aur saman hai
vo aate hain bahr-ayadat abas
nasibon se apne hai shikva hamen
karen kyuun kisi ki shikayat abas
mira haal sun kar vo hain be-qarar
kiya kis ne zikr-e-mohabbat abas
falak mar-miTon se na rakh ye ghubar
miTa be-kason ki na turbat abas
sununga tiri hosh men aa to luun
abhi se hai naseh nasihat abas
ye parda hasinon ko lazim na tha
chhupati hain ye achchhi surat abas
vo pahle suluk aap ke yaad hain
mire haal par ab inayat abas
takalluf men phir vo kahan sadgi
ye ara.ish-e-husn-o-zinat abas
‘hafiz’ is zamin men kaho sher kam
dikhao na zor-e-tabi.at abas
Leave a Reply