fitna phir aaj uThane ko hai sar lagta hai
ḳhuun hi ḳhuun mujhe rang-e-sahar lagta hai
ilm ki dev-qadi dekh ke Dar lagta hai
asmanon se ab insan ka sar lagta hai
mujh ko lagta hai nasheman ki mire ḳhair nahin
jab kisi shaḳh pe gulshan men tabar lagta hai
maan lo kaise ki main aib sarapa huun faqat
mere ahbab ka ye husn-e-nazar lagta hai
kal jise phunka tha ya kah ke ki dushman ka hai ghar
sochta huun to vo aaj apna hi ghar lagta hai
fan hai vo rog jo lagta nahin sab ko lekin
jis ko lagta hai use zindagi-bhar lagta hai
ehtiyatan koi dar phoḌ len divar men aur
shor baḌhta hua kuchh janib-e-dar lagta hai
ek darvaza hai har-samt nikalne ke liye
ho na ho ye to mujhe shaiḳh ka ghar lagta hai
chaman-e-sher men huun ik shajar-e-zinda magar
abhi ‘mulla’ miri Daali ye samar lagta hai
Leave a Reply