khuun se jab jala diya ek diya bujha hua
phir mujhe de diya gaya ek diya bujha hua
apne to ahad-e-shauq ke marhale sab aziiz the
ham ko visal sa laga ek diya bujha hua
ek hi dastan-e-shab ek hi silsila to hai
ek diya jala hua ek diya bujha hua
shoala hava-nazhad tha phir bhi hava ke haath ne
bas yahi faisla likha ek diya bujha hua
mahfil-e-rang-o-nur ki phir mujhe yaad aa gai
phir mujhe yaad aa gaya ek diya bujha hua
mujh ko nashat se fuzun rasm-e-vafa aziiz hai
mera rafiq-e-shab raha ek diya bujha hua
dard ki kaenat men mujh se bhi raushni rahi
vaise meri bisat kya ek diya bujha hua
sab miri raushni-e-jan harf-e-sukhan men Dhal gai
aur main jaise rah gaya ek diya bujha hua