main apne taur pe khela tha abginon se
mila huun yaron ko taht-us-sura ke zinon se
main aise shaḳhs ki taqlid karna chahta huun
jo saans leta raha doston ke sinon se
guman guzarta hai duniya ki tez-gami se
ki log ḳhvab bhi dekhenge dur-binon se
ye tajraba hai mira sarsari si baat nahin
koi bhi nukta milega na nukta-chinon se
hamari ankhon se aansu gire nadamat ke
hai diin phuuT paḌa kufr ki zaminon se
salami ka hai ye andaz janta huun magar
bahut se haath hain Tanke ga.e jabinon se
mizaj-e-vaqt moharram safar pe baat karen
sadi ka karb to mansub hai mahinon se
ye alamin ki tartib hi ulaT jaa.e
nikala jaa.e madina agar madinon se
main us dayar ki miTTi ko nuur janta huun
jahan pe barchhiyan toḌi ga.i thi sinon se
ye shaam jhiil shafaq mo’atabar hain apni jagah
mira mizaj zara muḳhtalif hai tinon se
sharafaton men vo yusuf-mizaj hote hain
tumhen mila.unga ghurbat-zada hasinon se
main sidhi baat ka aadi huun saanp kyuun bolun
main apne yaar nikalunga astinon se
Leave a Reply