pila saaqi bahar aa.e na aa.e
ghaTa phir baar baar aa.e na aa.e
tujhe ham dekhne a.enge sau baar
koi divana-var aa.e na aa.e
kahe ja.enge dard-e-dil ham apna
kisi ko e’tibar aa.e na aa.e
vo aa jaa.en idhar khole hue baal
nasim mushk-bar aa.e na aa.e
tumhen aram se sona mubarak
mujhe shab bhar qarar aa.e na aa.e
hava-e-shauq men ab uḌ chale ham
hava-e-ku-e-yar aa.e na aa.e
tire dil men masarrat ke khilen phuul
mire dil men bahar aa.e na aa.e
‘jalil’ ab mai-kashi ka lutf uThao
phir abr-e-nau-bahar aa.e na aa.e
Leave a Reply