Yunhi Kabhi Machal Gae Yunhi Kabhi Bahal Gae

Iqbal Khawar

yunhi kabhi machal ga.e yunhi kabhi bahal ga.e

ham ko kahan qarar tha tum se mile sanbhal ga.e

dil ki kabhi suni nahin aur kabhi to be-sabab

aankh zara si nam hui us ki taraf nikal ga.e

yunhi rahenge raat din yunhi zamin-o-asman

tum jo kabhi badal ga.e ham jo kabhi badal ga.e

koi daricha va hua koi na aaya baam par

aaj ye kis gali se ham gaate hue ghazal ga.e