Anwar Sadeed
dushman to mere tan se lahu chusta raha
main dam-ba-ḳhud khaḌa hi use dekhta raha
jo phuul jhaḌ ga.e the jo aansu bikhar ga.e
ḳhak-e-chaman se un ka pata puchhta raha
main paar kar chuka tha hazimat ki manzilen
har chand dushmanon ke barabar khaḌa raha
palkon pe jhulti hui shaffaf chilmanen
kal raat mera un se ajab silsila raha
us sang-e-dil ke paas kahan the vafa ke phuul
‘anvar-sadid’ jis ko sada pujta raha
Leave a Reply