jab bhi dekha hai baja dekha hai
aa.ina ḳhaak hua dekha hai
ye miri aankh nahin fitna hai
us ne har shaḳhs ḳhuda dekha hai
baat karte ho ravani ki tum
main ne dariya ko ruka dekha hai
jaane kitne hi zamane guzre
main ne har roz naya dekha hai
zahr ko zabt kiye baiTha huun
yuun to har dasht hara dekha hai
raat bhar niind nahin aati mujhe
main ne insan mara dekha hai
main ne iman ki ḳhatir ‘da.em’
sar ko neze pe chaḌha dekha hai
Leave a Reply