us lams ka koi naam to ho jo tujh ko soch ke jagta hai
jo tere zikr ke aate hi rag rag men daudne lagta hai
kyuun tere naam ko sunte hi miri saans mahakne lagti hai
ehsas nashe men hota hai har fikr bahakne lagti hai
ik nadida ehsas miri poron men ghulne lagta hai
ik band daricha hasrat ka khvabon men khulne lagta hai
jab chand nikal kar badal se ankhon men sapna bota hai
ik khvahish ki tanhai se bedar junun jab hota hai
jab dasht-e-talab men pyaas miri ankhon ko nigalne lagti hai
jab aas umiid ki duniya men ik shaam si dhalne lagti hai
jis vaqt ghamon ki vahshat ka ik saaya mujh par jhukta hai
us vaqt tira ehsas mire pahlu men aa kar rukta hai
aur us ehsas ke chhute hi main tabinda ho jaati huun
miri sansen chalne lagti hain phir se zinda ho jaati huun
Leave a Reply