Faisal Nadeem Faisal
mujh diye par ye ik ata rahi hai
ḳhud muhafiz miri hava rahi hai
log sahme hue hain hijrat se
dhuul chehron pe muskura rahi hai
tere iman ka ḳhuda-hafiz
tu use naam se bula rahi hai
shor har gaam kamyab raha
ḳhamushi gham men mubtala rahi hai
vaqt par kaar ban gaya so yahan
bebasi da.ere bana rahi hai
is ta.alluq pe maut vajib thi
dosti darmiyan aa rahi hai
tere mutalashiyon ki ḳhair jinhen
tirgi raste bata rahi hai
is ka radd-e-amal bhi dhyan men rakh
tu agar mas.ala uTha rahi hai
ham gharibon ki umr bhar ‘faisal’
pahli tarjih bas ana rahi hai
Leave a Reply