vaqif the kahan ham dil-e-na-char se pahle
kam-baḳht mohabbat ke is azar se pahle
nazren to uThate zara divar se pahle
ik aan to mil baiThte takrar se pahle
divana koi la.enge mujh jaisa kahan se
socha nahin ye aap ne inkar se pahle
pa-basta jigar-e-soḳhta dil-gir zaban band
sau zulm sahe dida-e-ḳhun-bar se pahle
ye koi naya tarz-e-taghaful to nahin hai
aisi to na thi dosti aghyar se pahle
asuda-e-gham-ha-e-ḳhizan ho ga.e aḳhir
phulon ne kahan puchha hamen ḳhaar se pahle
dil-sozi o ashufta-sari tohmat o dushnam
kya kya nahin dekha rasan-o-dar se pahle
‘sarvar’ ne suna.i hi nahin ahl-e-ḳhirad ko
apni ye ghazal jur.at-e-iz.har se pahle
Leave a Reply