is dil men apni jaan kabhi hai kabhi nahin
abad ye makan kabhi hai kabhi nahin
ghairon ki baat kya kahun is ki to yaad men
apna bhi mujh ko dhiyan kabhi hai kabhi nahin
vo din gae jo karte the ham muttasil fughan
ab ah-e-na-tavan kabhi hai kabhi nahin
jis aan men rahe tu use jaan mughtanim
yaan ki har ek aan kabhi hai kabhi nahin
ayyam-e-vasl par to bharosa na kijiyo
ye vaqt meri jaan kabhi hai kabhi nahin
aadat jo hai hamesha se us ki so hai gharaz
vo ham pe mehrban kabhi hai kabhi nahin
is dosti ka teri talavvun-mizaji se
apne taiin guman kabhi hai kabhi nahin
maghrur hojiyo na is auj-o-hasham pe tu
yaan ki ye izz-o-shan kabhi hai kabhi nahin
ashiq kahin hua hai ‘hasan’ kya hai us ka haal
ye aap men javan kabhi hai kabhi nahin
Leave a Reply