Poet
shauq-e-avara yunhi ḳhak-basar ja.ega
chand chupke se kisi ghar men utar ja.ega
us ki sohbat bhi hai ik ḳhvab-sara men rahna
vo jo chal dega to ye ḳhvab bikhar ja.ega
vaqt har zaḳhm ka marham hai pa lazim to nahin
zaḳhm jo us ne diya hai kabhi bhar ja.ega
jins-e-taza ke ḳharidar paḌe hain har-su
kaise be-kar mira harf-e-hunar ja.ega
soch liije ki ye ayyam guzar ja.enge
matla-e-fikr bahar-taur nikhar ja.ega
naḳhuda kashti men suraḳh kiye jaata hai
ham bhi Dubenge vahin aap jidhar ja.ega
shauq-e-didar men us sarv-e-ravan ke ‘shahid’
mausam-e-gul mire angan men Thahar ja.ega
Leave a Reply