So Hashr Mein Liye dil-e-Hasrat Maab Mein

so hashr men liye dil-e-hasrat ma.aab men

abad ho raha huun jahan-e-ḳharab men

ham apni be-qarari-e-dil se hain be-qarar

amezish-e-sukun hai is iztirab men

ab sair-e-gul kahan dil-e-rangin nazar kahan

ik ḳhvab tha jo dekh liya tha shabab men

baḌh baḌh ke chhup rahe hain pas parda baar baar

kya kya takallufat hain tark-e-hijab men

‘ahsan’ dil un ko do magar itna to puchh lo

lete ho tum ye naqd raqam kis hisab men

Leave a Comment