ho ga.e hain in dinon kuchh aql se ma.azur ham
hai jo nazdik apne us ko jante hain duur ham
jis ne ta.alim-e-anal-haq di tujhe roz-e-alast
hain usi ustad ke shagird ai mansur ham
abadiyat ke bhes men kuchh ham se ban sakti nahin
vo ga.e din jin dinon rakhte the kuchh maqdur ham
va.e-nadani ki hain anjam se kya be-ḳhabar
do hi din ki zindagi par ho ga.e maghrur ham
mas.ala kya puchhte ho ‘faiz’ jabr-o-qadr ka
muddaton muḳhtar the ab ho ga.e majbur ham
Leave a Reply