akhtar-ansari-akbarabadi

Sahaara de Nahin Sakte Shikasta Panw Ko

sahara de nahin sakte shikasta paanv ko

haTao rah-e-mohabbat se rahnumaon ko

bana raha huun hasin aur mah-laqaon ko

saja raha huun main afaq ki fazaon ko

nazar nazar se milata huun muskurata huun

junun ki shaan dikhata huun dil-rubaon ko

qadam qadam pe nae inqalab raqsan hain

duaen dete hain ham aap ki adaon ko

mila jo daman-e-sahil to aisi mauj aai

safine saunp diye ham ne na-ḳhudaon ko

nigah pherne valon se puchhta huun main

tum azmaoge kab tak miri vafaon ko

abhi to dasht-o-daman men bahar aai hai

abhi chaman men khilane hain gul havaon ko

chale hain janib-e-dar-o-rasan ḳharabati

gunah ka rang dikhana hai parsaon ko

har ek lamha-e-nau ka ab ehtiram karo

naya payam do ‘aḳhtar’ nai fazaon ko

More Poems

Leave a Comment