ḳhizan se peshtar saara chaman barbad hota hai
ghazab hota hai jab ḳhud baghban sayyad hota hai
tujhe is par guman-e-naghma-e-sayyad hota hai
qafas men nala-kash murgh-e-gulistan-zad hota hai
ḳhushi ke ba.ad ik tu hi nahin hai mubtala-e-gham
yunhi akasr jahan men ai dil-e-nashad, hota hai
rava rakhta hai vo bedad pahle apni fitrat par
jo insan dusre par ma.il-e-bedad hota hai
jo karta hai nisar-e-nau-e-insan apni hasti ko
vo insan iftiḳhar-e-alam-e-ijad hota hai
mire ash.ar ki tausif hoti hai mire hote
nahin ma.alum mere ba.ad kya irshad hota hai
na kar ‘mahrum’ tu fikr-e-suḳhan ab fikr-e-uqba kar
nava-parvaz bazm-e-sher men azad hota hai
Leave a Reply