suuna suuna dil ka mujhe nagar lagta hai
apne saae se bhi aaj to dar lagta hai
baant raha hai daman daman meri chahat
apna dil bhi kisi sakhi ka dar lagta hai
mahrumi ne jahan basera dhund liya hai
mujh ko to vo ghar bhi apna ghar lagta hai
meri barbadi men hissa hai apnon ka
mumkin hai ye baat ghalat ho par lagta hai
‘josh’ huun main divane-pan ki us manzil men
jahan raqib bhi apna nama-bar lagta hai
Leave a Reply