Quaiser Khalid
kohsar to kahin pe samundar bhi a.enge
apni talash men na.e manzar bhi a.enge
pamal raston se baghavat nahin gunah
qadren na.i hain to na.e rahbar bhi a.enge
surat men rang-o-nur kii, phulon kii, ham kahin
lauh-e-jahan pe harf-e-mukarrar bhi a.enge
nazuk-mizaj dete hain har lamha imtihan
shishon se jism ke liye patthar bhi a.enge
jab jab baḌhegi zulmat-e-gharat-gar-e-yaqin
avaz-e-haq pe kaTne na.e sar bhi a.enge
badle hain husn-o-ishq to aqdar bhi na.i
le kar na.e javaz sitamgar bhi a.enge
mahrumiyan kahin to kahin par navazishen
kya ye saval bar-sar-e-mahshar bhi a.enge
aa.e ho shahar-e-zar ki chaka-chaund men magar
mahlon ke saath raah men be-ghar bhi a.enge
mayus ho ke johd-e-musalsal na chhoḌna
zaḳhmon ke ba.ad hathon men gauhar bhi a.enge
hain pattharon se log hi is shahr-e-sang men
kya un ke vaste na.e manzar bhi a.enge
devi ko munsifi ki milega qarar tab
jab apna sar jhuka.e sitamgar bhi a.enge
‘ḳhalid’ tira vajud gavara nahin jinhen
bazm-e-suḳhan men kya vo suḳhnavar bhi a.enge
Leave a Reply