Poet
zamane Thiik hai in se bahut hue raushan
magar charagh kahan ḳhud ko kar sake raushan
sabhi ke zehn men us ka ḳhayal rahta hai
us ek nuur se hai kitne aa.ine raushan
abhi to ham ko ka.i roz jagmagana hai
hamin hai dasht men ik aḳhiri diye raushan
mahak usi ki miri rahnuma.i karti hai
usi ki chaap se hote hain raste raushan
ham ek umr se tarikiyon men simTe the
jab us ne chhu liya to ham bhi ho ga.e raushan
kisi ka aks mujhe ḳhvab men dikha tha kabhi
tamam umr rahe mere rat-jage raushan
ye aadhi raat ko dastak si kis ne di dil par
ye kis ne kar diye har samt qumqume raushan
ham ek ruḳh se andhere men aa ga.e lekin
ka.i ruḳhon se hamare hain silsile raushan
chalo ‘dinesh’ ab is dil se un ka nuur gaya
talashte hain ilaqe bache-khuche raushan
Leave a Reply