Ghar Kisi Ka Bhi Ho Jalta Nahin Dekha Jata

ghar kisī kā bhī ho jaltā nahīñ dekhā jaatā

ham se chup rah ke tamāsha nahīñ dekhā jaatā

terī azmat hai tū chāhe to samundar de de

māñgne vaale kā kaasa nahīñ dekhā jaatā

jab se sahrā kā safar kaaT ke ghar lauTā huuñ

tab se koī bhī ho pyāsā nahīñ dekhā jaatā

ye ibādat hai ibādat meñ siyāsat kaisī

is meñ ka.aba yā kalīsā nahīñ dekhā jaatā

mere lahje pe na jā qaul kā mafhūm samajh

baat sachchī ho to lahja nahīñ dekhā jaatā

aks ubhregā ‘nafas’ gard haTā de pahle

dhundhle ā.īne meñ chehra nahīñ dekhā jaatā

Leave a Comment