Munh Kis Tarah Se moD Lun Aise Payam Se

muñh kis tarah se moḌ luuñ aise payām se

mujh ko bulā rahā hai vo ḳhud apne naam se

so.e to sabz pair kā saaya sarak gayā

Derā jamā rakhā thā baḌe ehtimām se

kaise miTā sakegā mujhe sail-e-āb-o-gil

nisbat hai mere naqsh ko naqsh-e-davām se

go shahr-e-ḳhuftgāñ meñ qayāmat kā ran paḌā

talvār phir bhī niklī na koī niyām se

haala banā rahā hai tū ab un ke zikr kā

kab ke ga.e vo log salām-o-payām se

maiñ to asīr-e-garmī-e-bāzār huuñ ‘rashīd’

mujh ko ġharaz na jins se darham na daam se

Leave a Comment