Pritpal Singh Betab
kuchh ummid bandha de chahe dhoka de
jiine ka mujh ko bhi ek bahana de
na.e qalam se na.e huruf likhun main bhi
tu bhi mujh ko apna kaghaz kora de
bhul-bhulayyon men kyon mujh ko rakhta hai
safar diya hai to ik sidha rasta de
umr se lambi ho ga.i ye tarik surang
dusri or ka ab to hamen bhi ujala de
ḳhvahish chand sitaron ki ik gaThḌi hai
meri chadar asman par phaila de
bure jahan hon vahin rahen abad sada
jo achchhe hain un ko des-nikala de
ḳhud-sar main bhi hona chahta huun ‘betab’
ik talvar mire sar par bhi tu laTka de
Leave a Reply