tez ehsas-e-ḳhudi darkar hai
zindagi ko zindagi darkar hai
jo chaḌha jaa.e ḳhumistan-e-jahan
haan vahi lab-tishnagi darkar hai
devtaon ka ḳhuda se hoga kaam
aadmi ko aadmi darkar hai
sau gulistan jis udasi par nisar
mujh ko vo afsurdagi darkar hai
sha.eri hai sar-basar tahzib-e-qalb
us ko gham sha.istagi darkar hai
sho.ala men laata hai jo soz-o-gudaz
vo ḳhulus-e-batni darkar hai
ḳhubi-e-lafz-o-bayan se kuchh siva
sha.eri ko sahiri darkar hai
qadir-e-mutlaq ko bhi insan ki
sunte hain be-chargi darkar hai
aur honge talib-e-mad.h-e-jahan
mujh ko bas teri ḳhushi darkar hai
aql men yuun to nahin koi kami
ik zara divangi darkar hai
hosh valon ko bhi meri raa.e men
ek guuna be-ḳhudi darkar hai
ḳhatra-e-bisyar-dani ki qasam
ilm men bhi kuchh kami darkar hai
dosto kaafi nahin chashm-e-ḳhirad
ishq ko bhi raushni darkar hai
meri ghazlon men haqa.eq hain faqat
aap ko to sha.eri darkar hai
tere paas aaya huun kahne ek baat
mujh ko teri dosti darkar hai
main jafaon ka na karta yuun gila
aaj teri na-ḳhushi darkar hai
us ki zulf arasta-pairasta
ik zara si barhami darkar hai
zinda-dil tha taza-dam tha hijr men
aaj mujh ko be-dili darkar hai
halqa halqa gesu-e-shab rang-e-yar
mujh ko teri abtari darkar hai
aql ne kal mere kanon men kaha
mujh ko teri zindagi darkar hai
tez-rau tahzib-e-alam ko ‘firaq’
ik zara ahistagi darkar hai
Leave a Reply