badan ki qabr men ḳhvabon ki laash hai main huun
qadam qadam pe hi fikr-e-ma.ash hai main huun
zamane bhar men to ye raaz faash hai main huun
magar mujhe to miri hi talash hai main huun
har ek zarb na.e tajarbe ukere hai
hayat hai ki koi sang-tarash hai main huun
lagengi boliyan jannat ki ab sar-e-bazar
bikegi ḳhuld-e-barin uf vinash hai main huun
jo vaqt maazi men guzra hai kaash ruk jaata
labon pe aaj faqat lafz-e-kash hai main huun
har ik qadam pe na.i hasraten panapti hain
na jaane kaisa ye ik moh-pash hai main huun
kyuun lamha lamha hi baḌhti hi ja rahi hai ‘shahab’
ye guzre vaqt ki kaisi ḳharash hai main huun
Leave a Reply