abbas-tabish

Wo Kaun Hai Jo Pas-e-Chashm-e-Tar Nahin Aata

vo kaun hai jo pas-e-chashm-e-tar nahin aata

samajh to aata hai lekin nazar nahin aata

agar ye tum ho to sabit karo ki ye tum ho

gaya hua to koi laut kar nahin aata

ye dil bhi kaisa shajar hai ki jis ki shakhon par

parinde aate hain lekin samar nahin aata

ye jama kharch zabani hai us ke baare men

koi bhi shakhs use dekh kar nahin aata

hamari khaak pe andhi hava ka pahra hai

use khabar hai yahan kuza-gar nahin aata

ye baat sach hai ki is ko bhula diya main ne

magar yaqin mujhe is baat par nahin aata

nazar jamae rakhunga main chand par ‘tabish’

ki jab talak ye parinda utar nahin aata

More Poems

Leave a Comment