Na Nind Aur Na KHwabon Se Aankh Bharni Hai

na niiñd aur na ḳhvāboñ se aañkh bharnī hai

ki us se ham ne tujhe dekhne kī karnī hai

kisī daraḳht kī hiddat meñ din guzārnā hai

kisī charāg kī chhāñv meñ raat karnī hai

vo phuul aur kisī shāḳh par nahīñ khulnā

vo zulf sirf mire haath se sañvarnī hai

tamām nāḳhudā sāhil se duur ho jaa.eñ

samundaroñ se akele meñ baat karnī hai

hamāre gaañv kā har phuul marne vaalā hai

ab us galī se vo ḳhushbū nahīñ guzarnī hai

tire ziyāñ pe maiñ apnā ziyāñ na kar baiThūñ

ki mujh murīd kā murshid ‘uvais-qarnī’ hai

Leave a Comment