na niind aur na ḳhvabon se aankh bharni hai
ki us se ham ne tujhe dekhne ki karni hai
kisi daraḳht ki hiddat men din guzarna hai
kisi charag ki chhanv men raat karni hai
vo phuul aur kisi shaḳh par nahin khulna
vo zulf sirf mire haath se sanvarni hai
tamam naḳhuda sahil se duur ho jaa.en
samundaron se akele men baat karni hai
hamare gaanv ka har phuul marne vaala hai
ab us gali se vo ḳhushbu nahin guzarni hai
tire ziyan pe main apna ziyan na kar baiThun
ki mujh murid ka murshid ‘uvais-qarni’ hai
Leave a Reply