Poet
is qadar havadis hain rasta nahin milta
zindagi ke misron ka qafiya nahin milta
tere bin palaT ja.un ye bhi ab nahin mumkin
aur aage baḌhne ka hausla nahin milta
aap apni surat ko ḳhud pe ashkara kar
shahr ki fasilon par aa.ina nahin milta
be-charagh raston par be-shumar jugnu the
phir bhi ek bulbul ko ghonsla nahin milta
log milte rahte hain aaj bhi tire jaise
tujh sa par kahin koi ba-ḳhuda nahin milta
kaisa daur aaya hai ham siyah-baḳhton ne
sabr kar ke dekha hai kuchh sila nahin milta
muntazir nigahon se aan baiThe chaukhaT par
mere haq men us dar se faisla nahin milta
main to aise logon se duur hi bhale janan
jin se meri sochon ka zaviya nahin milta
ham si faḳhtaon ka tum se jangjuon se
aaj bhi to kal jaisa nazriya nahin milta
munsifi ki qimat hi dastaras se bahar thi
is liye faqiron ko faisla nahin milta
roz be-murad iman ham to lauT aate hain
tum se baat karne ko taḳhliya nahin milta
Leave a Reply