Kal Jo Rone Par Mere Tuk Dhyan Us Ka Pad Gaya

kal jo rone par mire tuk dhyan us ka pad gaya

hans ke yuun kahne laga ”kuchh aankh men kya pad gaya?”

baithe baithe aap se kar baithta huun kuchh gunah

paanv padne ka jo us ke mujh ko chaska pad gaya

jang-jui kya kahun us ki ki kal-parson men aah

sulh tuk hone na paai thi ki jhagda pad gaya

sozish-e-dil kuchh na puchho tum ki tuk siine pe raat

haath rakhte hi hatheli men phaphula pad gaya

bas ki tha be-bal-o-par main daman-e-sayyad par

khuun bhi ud kar dam-e-bismil na mera pad gaya

jo mire bad-go hain tum un ko samajhte ho bhala

vah-va mujh se tumhen ye bair achchha pad gaya

kyuun pada dam todta hai bistar-e-gham par dila

aah kis be-dard ke milne men toda pad gaya

behtari ka munh na dekha mar hi kar paai najat

kudhte kudhte dil mira bimar aisa pad gaya

baten karte karte pyare dil dhadakne kyuun laga

sun ke kuchh aahat kaho kya dil men khatka pad gaya

ruk gaya aisa hi vo jo phir na aaya kal jo tuk

haath us ke paanv par bhule se mera pad gaya

main to yaan is baat par apne pada malta huun haath

aur saare shahr men kuchh aur charcha pad gaya

garche huun main naam ko ‘jurat’ par ab us ki taraf

aankh utha sakta nahin ye dil men khatra pad gaya

Leave a Comment