Poet
main yaan baitha to tum vaan uth gae ai yaar kya baais
hue be-dil hi apne aap kyuun bezar kya baais
inayat ki nahin agli se ab asar kya baais
kiye hain band tum ne rakhna-e-divar kya baais
kaha main ne mire ghar bhi kabhu aaoge ye bole
main kyuun aauun mujhe kya vasta kya kaar kya baais
nidar la-taqnatu padh kar gunahon se tha main apne
ye vaaiz kyuun darate hain mujhe ghaffar kya baais
tumhari khatir-vatir men ai gul-ru ye kya aaya so
mujhe kyuun dekh kar hanste ho tum har baar kya baais
faqat ik diid ko nadida dil aur diida hai apna
to ai be-did dikhlata nahin didar kya baais
pas-e-murdan miri balin pe ro kar ye lage kahne
tu kyuun chupka pada hai ashiq-e-bimar kya baais
sakhi se som behtar hai javab saaf jo deve
kabhi inkar kya maujib kabhi iqrar kya baais
bigad us aina-ru se nahin gar aap ka ‘ehsan’
bani hairat se kyuun tum surat-e-divar kya baais
Leave a Reply