Taimur Hasan
vo jo mumkin na ho mumkin ye bana deta hai
ḳhvab dariya ke kinaron ko mila deta hai
zindagi bhar ki riyazat miri be-kar ga.i
ik ḳhayal aaya tha badle men vo kya deta hai
ab mujhe lagta hai dushman mira apna chehra
mujh se pahle ye mira haal bata deta hai
chand jumle vo ada karta hai aise Dhab se
mere afkar ki buniyad hila deta hai
ye bhi e.ajaz-e-mohabbat hai ki rone vaala
rote rote tujhe hansne ki dua deta hai
zindagi jang hai a.asab ki aur ye bhi suno
ishq a.asab ko mazbut bana deta hai
baiThe baiThe use kya hota hai jaane ‘taimur’
jalta cigaret vo hatheli pe bujha deta hai
ye jahan is liye achchha nahin lagta ‘taimur’
jab bhi deta hai mujhe tera gila deta hai
Leave a Reply