Abhinandan Pandey
dil dasht hai to ashk-fishani karenge ham
ye kaam bas bara-e-ravani karenge ham
baithe hain shamiyana-e-shab-rang men udaas
rang-e-rukh-e-shafaq abhi dhani karenge ham
pichhle baras ke ishq pe ham ko yaqin tha
agle baras ka ishq gumani karenge ham
chahen to is ko tegh-e-khamoshi se kaat den
lekin junun se jang zabani karenge ham
thahre hain sail-e-harf-o-maani men dam-ba-khud
zahir kabhi to dard-e-nihani karenge ham
qamat pe apni naaz kare koh-e-sham-e-gham
ghabra ke aaj marsiya-khvani karenge ham
dariya ki samt bhagte jaenge saari umr
akhir men apni pyaas ko paani karenge ham
Leave a Reply