vo ḳhvab dikhate hai sakar nahin karte
ulfat se magar khul ke inkar nahin karte
bas baat koi un ko samjha de ye itni si
rishton men kabhi koi bevpar nahin karte
dil us ne kiya chhalni be-rahmi se pesh aaya
dushman pe bhi ham apne yuun vaar nahin karte
dekha hai mohabbat men barbad hue kitne
ham dil ko bachate hai bimar nahin karte
tufan koi aa.e is rah-e-mohabbat men
is dil ko kabhi apne bezar nahin karte
ham achchhe bure jaise bhi samne hai sab ke
ham apni haqiqat se inkar nahin karte
maana ki hue zaḳhmi ye qalb-o-jigar lekin
ham zaḳhm chhupate hain aḳhbar nahin karte
Leave a Reply