Aarzu Thi Ek Din Tujhse Milun

aarzū thī ek din tujh se milūñ

mil gayā to sochtā huuñ kyā karūñ

jism tū bhī aur maiñ bhī jism huuñ

kis tarah phir terā pairāhan banūñ

rāsta koī kahīñ miltā nahīñ

jism meñ janmoñ se apne qaid huuñ

thī ghuTan pahle bhī par aisī na thī

jī meñ aatā hai ki khiḌkī khol duuñ

ḳhud-kushī ke saiñkaḌoñ andāz haiñ

aarzū hī kā na dāman thaam luuñ

sā.ateñ san.at-garī karne lagīñ

har taraf hai yaad kā gahrā fusūñ

Leave a Comment